تاند (دوشنبه، د زمري/ اسد ۶ مه) ایران اعلان کړی چې غواړي له ګاونډیو هېوادونو سره درې نوي رېللارې پرانیزي، څو په سیمه کې تګراتګ زیات شي.
د ایران د پریس ټي وي د راپور له مخې، د دغه هیواد د رېللارې ملي شرکت (RAJA) رئیس او د سړکونو او ښاري پراختیا مرستیال وزیر، جبارعلي ذاکري، د شنبې په ورځ ویلي چې دغه نوې رېللارې به ترکيې، افغانستان او ترکمنستان ته وغځېږي.
ذاکري ویلي، شرکت پلان لري چې له تهران څخه د ترکيې پلازمېنې انقرې ته په رېلګاډي کې د سپرلیو مستقیم تګ راتګ پیل کړي. دا نوې لاره به د تهران ـ وان د اوسنۍ رېللارې د پراخولو په معنا وي.
نوموړي زیاته کړې، چې د ایران او ترکيې چارواکي د دې لارې د مالي اړخونو، په ځانګړي ډول د ټکټونو د قیمتونو په اړه خبرې کوي، او تمه لري چې د راتلونکو دوو میاشتو په ترڅ کې دا سفرونه پیل شي.
ذاکري همداراز ویلي، بله نوې پروژه به له تهران او مشهد څخه د افغانستان د هرات ښار ترمنځ د مسافرو سفرونه رانغاړي، او دغه سفرونه به وروسته له دې ژر پیل شي چې ایران او افغانستان د تګراتګ د اسنادو ستونزې حل کړي.
نوموړي ویلي، دغه پروژه به له ایرانه د افغانستان هرات ښار ته نژدې د “روزنک” تر سیمې پورې مستقیم سفر ته زمینه برابره کړي، او وروسته به چې ایراني قرارداديان د روزنک او هرات ترمنځ ۷۰ کیلومتره رېللاره بشپړه کړي، تر هرات ښار پورې وغځېږي.
ذاکري زیاته کړې چې د ایران د رېللارو ملي شرکت پلان لري له مشهده د ترکمنستان مرو ښار ته هم د مسافرو لپاره رېللاره فعاله کړي.
د ذاکري په وینا، دغه رېللاره به له منځنۍ آسیا سره د ایران اقتصادي او سوداګریزې اړیکې پیاوړې کړي، ځکه دا به ایرانیو مسافرو ته تر ازبکستان او تاجکستان پورې هم اسانه لاسرسی برابر کړي.