تاند『چهارشنبه د چنګاښ ـ سرطان ۱۸مه』د کډوالو ستونزو ته د رسېدنې عالي کمېسیون د راپور له مخې، تېره ورځ سه شنبې ۲ زره ۶۰۴ کډوالې کورنۍ هېواد ته راستنې شوې دي.
یاد کمېسیون ویلي، دغه شمېر کورنۍ چې د غړو شمېر یې ۱۶ زره ۲۶۲ تنه کیږي له ایران او پاکستانه راستانه کړای شوي.
سرچینه زیاتوي، چې دا کډوال د تورخم، سپین بولدک، اسلام کلا او ورېښمو پله له لارې هېواد ته راستنې شوې دي.
د طالبانو کډوالو ستونزو ته د رسېدنې کمېسیون د راپور له مخې، د راستنو شویو کورنیو له ډلې یې ۴۶۰ خپلو اصلي سیمو ته لېږدول شوې او ۳ زره ۴۷۴ تنه کډوالو سره بیا مرستې شوې دي.
دا په داسې حال کې ده، چې له ایران څخه افغانستان ته د افغانانو د بېرته ستنېدو لړۍ چټکه شوې، چې دې چارې د کډوالو نړېوالو بنسټونو اندېښنې هم راپارولې دي او هغه یې د کډوالۍ اصولو خلاف کړنه بللې.
تازه افغانستان لپاره د امریکا پخوانی ځانګړي استازي زلمي خلیلزاد له ایرانه غوښتي، چې کډوال باید په “مدني او عزتمندانه” ډول بېرته افغانستان ته واستوي.
زلمي خلیلزاد په خپله اېکس پاڼه لیکلي، چې د ایران له خوا ایستل شويو کډوالو د وضعیت په اړه یې “د اندېښنې وړ راپورونه” تر لاسه کړي، چې د هرات له پولې ورته رسېدلي.
خلیلزاد ټینګار کړی چې، یو له اغېزمنو اقداماتو څخه د کډوالو د ایستلو بهیر ورو کول او له ملي او نړیوالو مرستندویو ادارو سره همغږي ده.