تاند (چهارشنبه، د چنګاښ/ سرطان ۱۱ مه) په خیبرپښتونخوا کې د سړ ک د غاړې په یوه بمي حمله کې د پاکستان د یوه ځايي چارواکي په ګډون لږترلږه ۵ تنه ووژل شول او ۱۱ نور ژوبل شول.
ځايي سرچینو اسوشیتید پریس خبري اژانس ته وویل، دا برید نن (چهارشنبې) په باجوړ کې وشو. په وژل شویو کسانو کې د باجوړ مرستیال کمیشنر فیصل سلطان هم شامل دی.
د باجوړ د پولیسو مشر وقاص رفیق وویل چې په دې پېښه کې یوولس تنه نور ټپیان شوي چې د اکثرو حال نازک دی.
له دې داسي څرګندېږي چې د مرګ ژوبلو شمېر تر دې اوړي.
تراوسه پورې د دې برید مسوولیت کومې ډلې په غاړه نه دی اخیستی خو په باجوړاو نوره پښتونخوا کې ټي ټي پي ډېره فعاله ده او د اکثرو حملو مسوولیت مني.
تر دې وړاندې د روانې اوونۍ د شنبې په ورځ په شمالي وزیرستان کې په یوه ځانمرګي برید کې لږترلږه ۱۶ پوځیان وژل شوي وو.
د شمالي وزیرستان د برید مسوولیت د ټي ټي پي د ګل بهادر ډلې په غاړه اخیستی و.
په بلوچستان کې د بلوچستان د ازادۍ پوځ او په خیبرپښتونخوا کې ټي ټي پي د پاکستان پر پوځ مرګونو بریدونو ته دوام ورکوي.