تاند『یکشنبه د چنګاښ ـ سرطان ۸مه』د مالیزیا لومړي وزیر انور ابراهیم له لوري کابل ته رالېږل شوي پلاوي د طالبانو د بهرنیو چارو له سرپرست وزیر امیرخان متقي سره لیدلي.
د طالبانو د بهرنیو چارو وزارت خبر ورکړی،چې دې لیدنه کې دواړو خواوو د افغانستان او مالیزیا ترمنځ د سیاسي او اقتصادي اړیکو او د کابل او کوالالامپور ترمنځ د همکاریو په پراخولو خبرې کړې دي.
متقي ویلي، چې د افغانستان اړیکې له نړیوالې ټولنې سره د پراخېدو په حال کې دي.
له بلې خوا مالیزیایي پلاوي هم د د دواړو لورو ترمنځ د اړیکو پر پراخېدو ټینګار کړی.
یاد پلاوي هیله څرګنده کړې، چې په نږدې راتلونکي کې به د دواړو هېوادونو لوړپوړي چارواکي کابل او کوالالامپور ته سفرونه وکړي.
مالیزیایي پلاوی په داسې حال کې کابل ته سفر کوي، چې له دې وړاندې د مالیزیا لومړي وزیر ویلي و، چې وخت را رسېدلی څو نړیواله ټولنه د طالبانو حکومت په رسمیت وپېژني.