تاند『پنجشنبه د چنګاښ ـ سرطان ۵مه』د طالبانو د عامې روغتیا وزارت سرپرست مولوي نور جلال جلالي د نشه يي توکو پر وړاندې د مبارزې د نړوالې ورځې په مراسمو کې وویل، د دوی د مشر هبة الله د فرمان له مخې په ټول هېوا کې د نشه يي توکو په کښت کلک بندیز لګیدلی او د دغه کښت د مخنیوي په موخه لا هم هڅې روانې دي.
نوموړی له ټولو نړیوالو بنسټونه غواړي، چې له عامې روغتیا وزارت سره په نشه يي توکو د روږدو کسانو د درملنې په برخه کې همکاري وکړي.
په ورته وخت کې د طالبانو د عامې روغتیا وزارت د معالجوي طب عمومي رییس ډاکټر وحدت الکوزی وایي، په تېرو څه باندې درې نیم کلونو کې د هېواد په بېلابېلو ولایتونو کې په نشه يي توکو روږدو کسانو د درملني لپاره ۲۰ مرکزونه رغول شوي او دغه راز ۸۰ زره کسان له نشه یې توکو رغېدلي دي.
نیوکې دا دي چې د روږدو په روغتیایي مرکزونو کې څنګه چې لازمه ده د روږدو درملنه نه کېږي.
دوی وایي د لنډ وخت لپاره د روږدو درملنه او بېرته د دوی بې روزګاره خوشې کولی د دې لامل کېږي چې بیا نشو ته مخه کړي.
د نظر خاوندان وایي، که حاکم نظام د روږدو تر درملنې وروسته دوی ته کاري زمینې برابره کړي نو دوی سره به په درملنه کې ډېره مرسته وکړي.