تاند「شنبه د چنګاښ ـ سرطان لومړۍ」د طالبانو د کرنې، اوبو لګولو او مالدارۍ وزارت سرپرست، عطاءالله عمري رویټرز خبري اژانس ته ویلي، چې افغانستان له روسیې سره د ځینو خوراکي توکو پر وارداتو خبرې کوي.
نوموړي د سنټ پټرزبرګ اقتصادي غونډې په څنډه کې دغه راز زیاته کړې، چې افغانستان لا هم پر ځینو ایراني خوراکي توکو متکي دی او که ستونزه پیدا شي، نو دغه واردات به له روسیې پیل کړي.
ایران افغانستان ته لبنیات او ځینې نور خوراکي توکي صادروي خو اوس د ایران – اسراییل روانې جګړې د افغانستان د سوداګرۍ پر وړاندې هم اندېښنې راپورته کړې دي.
افغانستان بیا له روسیې او قزاقستانه په لویه کچه اوړه او غنم را واردوي.
د طالبانو د کرنې وزارت سرپرست بیا له روسیې غوښتي چې افغانستان ته د اوړو پر ځای غنم صادر کړي.
باور دا دی که افغانستان کې طالبان پر داخلي کرنیزو محصولاتو تمرکز زیات او د هېواد دښتې خړوبې کړي، نو په کرنیزه برخه کې به ژر په ځان متکي او د نورو له احتیاجه خلاص شي.