تاند「جمعه د غبرګولي ـ جوزا ۲۳مه」 اسرائیلو د ایران د پلازمېنې پر بېلابېلو سیمو د پراخو هوایي بریدونو په ترڅ کې د سپاه پاسداران یو شمېر لوړپوړي قوماندانان او دغه راز د دې هېواد ځینې نظامي او اټومي تأسیسات په نښه کړي.
ایراني رسنیو د سپاه پاسداران د عمومي قوماندان سردار حسین سلامي، د وسلوالو ځواکونو لوی درستیز محمد باقري او د ایران یو شمېر اټومي ساینسپوهانو د وژل کېدو منښته کړې ده.
د دې بریدونو په غبرګون کې د ایران مذهبي مشر آیتالله علي خامنهاي په یوه اعلامیه کې خبرداری ورکړی، چې اسرائیل به د دې برید سخت ځواب وویني.
بل لور ته د اسرائیلو حکومت اعلان کړی، چې د دې عملیاتو موخه د ایران اټومي بنسټونو او تأسیساتو له منځه وړل وو او زیاته کړې ده، چې دغه بریدونه د امریکا په همغږۍ ترسره شوي دي.
په ورته مهال ځینو نړیوالو رسنیو راپور ورکړی، چې په راتلونکو ورځو کې هم د دغو بریدونو د دوام امکان شته.
دا برید داسې مهال ترسره کېږي، چې تازه د امریکا او ایران ترمنځ د خبرو اترو شپږم پړاو پیلېدونکی دی.
تر دې وړاندې د دواړو هېوادونو ترمنځ پینځه پړاوه خبرې شوي، خو د کارپوهانو په باور د امریکا او ایران ترمنځ په یادو پړاوونو کې کوم مثبت بدلون نه لیدل کېږي.