تاند (پنجشنبه، د غبرګولي/ جوزا ۲۲ مه) د پکتيا د ځاځي آريوب ولسوالۍ اوسېدونکو په شخصي لګښت يو پُل جوړ کړی او او اوس ورڅخه کار اخیستل کېږي.
د سیمې اوسیدونکي وايي د دې پُل پر جوړولو یې شاوخوا ۳ ميليون افغانۍ لګولي دي. دا پیسې چې د ځايي سوداګرو، مسافرو او خلکو سره راټولې کړې وې.
سرچينې زياتوي چې دغه پُل ۱۸ متره اوږدوالی او ۳ متره پلنوالی لري، چې د دې ولسوالۍ شاوخوا ۲۰۰ کورنيو ته د تګ راتګ اسانتيا برابروي.
خلک د دغه پُل په جوړېدو خوښي څرګندوي او وايي، نور به د بارانونو او سېلابونو پر مهال له ستونزو سره نه مخامخ کېږي.
تېره اوونۍ په خوست کې هم د ځايي اوسیدونکو په شخصي لګښت دوه پُلونه جوړ شوي وو.
په پکتیا او خوست کې پخوا خلکو په خپلو پیسو او خولو څو سړکونه هم جوړ کړي وو.