تاند【پنجشنبه د غبرګولي ـ جوزا ۸مه】د خوړو نړیوال پروګرام ( ډبلیو ایف پي ) پر خپله اېکس پاڼه لیکلي، چې په افغانستان کې څه باندې ۴ میلیونه مېندې او ماشومان پر خوارځواکۍ اخته دي.
یاد پروګرام ویلي، د دغو مېندو له ډلې ځینې یې د روغتیا نړیوال سازمان په ملاتړ تر درملنې لاندې دي.
له دې وړاندې هم خوړو نړیوال سازمان خبرداری ورکړی و چې ښايي په ۲۰۲۵ کال کې ۳.۵ ملیونه ماشومان پر خوارځواکۍ اخته شي.
د طالبانو روغتیا وزارت بیا په دې تړاو تر اوسه غبرګون نه دی ښودلی.
بل لورته د روغتیا نړیوال سازمان ( ډبلیو ایچ او ) پر خپله اېکس پاڼه په یوه خبرپاڼه کې ویلي چې د افغانستان په ۳۴ ولایتونو کې یې پر روغتیايي مرکزونو ۱۹۴ قلمه روغتیايي توکي ویشلي دي.
په خبرپاڼه کې راغلي چې دا مرستې د اروپايي ټولنې په ملاتړ چمتو شوې دي.
د روغتیا نړیوال سازمان زیاته کړې چې دا توکي د سرطان د تشخیص، د مایکرو بیولوژۍ او بایو کیمیکل ازمایښتونو ترسراوي لپاره اړین دي.