تاند (دوشنبه، د غويي/ ثور ۲۹ مه) د تاجکستان د ترانسپورت وزیر، عظیم ابراهیم، د چین–تاجکستان–افغانستان د ترانسپورتي دهلېز د ګډې پروژې د تطبیق لپاره د تفاهملیک د ژر لاسلیک غوښتنه وکړه.
د ترند خبري آژانس د تاجکستان د ترانسپورت وزارت له قوله راپور ورکړ چې دا وړاندیز د قزاقستان په پلازمېنه استانه کې، د چین او منځنۍ آسیا د ترانسپورت وزیرانو د دوهمې ناستې په څنډه کې د چین د ترانسپورت له وزیر لیو وي سره د ابراهیم د لیدنې پر مهال شوی دی.
ابراهیم همداراز وړاندیز وکړ چې د نړیوالو باروړونکو موټرو لپاره د جوازونو د تبادلې کوټې دې زیاتې شي او د دواړو حکومتونو ترمنځ د نړیوال ترانسپورت د هوکړې مسوده دې نهايي شي.
په مقابل کې، لیو وي د تاجکستان وزیرانو ته بلنه ورکړه چې د ۲۰۲۵ کال د جون له ۳۰مې څخه د جولای تر ۲مې پورې په بېجېنګ کې د شانګهای د همکارۍ سازمان د ترانسپورت وزیرانو په دوولسمه ناسته کې ګډون وکړي.