تاند【یکشنبه د ثور ـ غویي ۲۱مه】‏د طالبانو سرپرست حکومت اقتصادي مرستیال ملا عبدالغني برادر د مس عینک پروژې د قراردادي شرکت له عمومي رییس وانګ جي چینګ سره په کتنه کې د دې پروژې اهمیت ته په اشارې ویلي، چې مس عینک د افغانستان لپاره یوه ستره اقتصادي پروژه ده او طالبان یاد شرکت ته ټولې اړینې اسانتیاوې برابرې کړې دي.

برادر له یاد شرکت څخه غوښتي، چې د پروژې ساختماني چارې دې ژر پیل شي.

د ام‌ سي‌ سي شرکت رییس د سرپرست حکومت له همکاریو مننه کړې او د پروژې پرمختګونو په اړه یې معلومات ورکړي دي.

نوموړي ټینګار کړی،چې چمتو دي دغه پروژه د کانونو او پټرولیم وزارت سره په همغږۍ پر مخ یوسي.

دغه راز د یوه بل خبر له مخې ‏د افغانستان لپاره د چین ځانګړي استازي، یو شیاویونګ، د طالبانو د بهرنیو چارو سرپرست وزیر امیر خان متقي سره د سیاسي اړیکو او اقتصادي همکاریو پر پیاوړتیا خبرې کړې دي.

د بهرنیو چارو وزارت د خبرپاڼې له مخې، په دې کتنه کې متقي د چین له دوامداره ملاتړ څخه مننه کړې او د دواړو هېوادونو ترمنځ د سوداګریزې همکارۍ پرمختګونه یې ستایلې دي.

د چین ځانګړي استازي هم د چین د بهرنیو چارو وزیر له لوري، متقي ته د چین سفر بلنه ورکړه، چې دغه بلنه د متقي له لوري منل شوې ده.