تاند【یکشنبه د ثور ـ غویي ۲۱مه】د طالبانو د حکومت ‏د صنعت او سوداګرۍ وزارت سرپرست ‎نورالدين عزيزي په مشرۍ په کابل کې د افغانستان، پاکستان او چين ترمنځ درې اړخيره ناسته وشوه.

ياد وزارت وايي، په دې ناسته کې د ګډو صنعتي پارکونو جوړول، د ځانګړو اقتصادي زونونو رامنځته‌کېدل، د صادراتو د پروسس ګډ مرکزونه، د درې اړخيزو سوداګريزو نندارتونونو جوړول، د کوچنيو او منځنيو تشبثاتو د ملاتړ مرکزونه او دغه راز د درېيو واړو هېوادونو ترمنځ د بانکي اړيکو د اسانتياوو رامنځته‌کېدو په تړاوو خبرې وشوې.

عزيزي د طالبانو پالیسي اقتصادمحوره بللې او زياته کړې يې ده، چې د پانګونې د راخپلو لپاره زموږ ټولې برنامې د ګډو ګټو پر بنسټ ترتیب او پلي کېږي.

دغه ناسته پرون شنبه د ثور په ۲۰مه د افغانستان، پاکستان او چین د استازو ترمنځ وشوه.

تر ناستې وروسته د طالبانو سرپرست حکومت اقتصادي مرستیال ملا عبدالغني برادر د مس عینک پروژې د قراردادي شرکت له عمومي رییس وانګ جي چینګ سره په کتنه کې د دې پروژې اهمیت ته په اشارې ویلي، چې مس عینک د افغانستان لپاره یوه ستره اقتصادي پروژه بللې ده او زیاته کړې ده چې طالبان یاد شرکت ته ټولې اړینې اسانتیاوې برابرې کړې دي.

برادر له یاد شرکت څخه غوښتي، چې د پروژې ساختماني چارې دې ژر پیل شي.