تاند【چهارشنبه د ثورـ غویي ۱۷مه】هند تېره شپه د پهلګام پېښې د غچ په اخیستو په پار د پاکستان یو شمېر سیمې د «سندور» عملیاتو په نوم برید کې په نښه کړې.
د وروستیو معلوماتو له مخې ۲۶ کسان پکې ووژل شول او نږدې ۵۰ نور ټپیان شوي دي.
تر برید وروسته یو شمېر هېوادونو هم غبرګونونه ښودلې.
د امریکا ولسمشر ډونالډ ټرمپ پر پاکستان د هند برید ته غبرګون کې د ترینګلتیا ژر پای ته رسېدو ترڅنګ یې پر پاکستان د هند برید د شرم ځای بللی دی.
بل لورته بیا د چین بهرنیو چارو وزارت وايي، هېواد یې د هند او پاکستان ترمنځ د تاوتریخوالي پرمختګونه له نږدې څاري او خپلو اتباعو ته یې سپارښتنه کړې چې د شخړې سیمې ته نږدې له ورتګ ډډه وکړي.
د روسیې د بهرنیو چارو وزارت ویلي، چې د هند او پاکستان ترمنځ د پوځي شخړې د ژورېدو په اړه ژوره اندیښنه لري او له دواړو هېوادونو یې غوښتي چې زغم وښيي.
د طالبانو حکومت که څه هم تازه غبرګون نه دی ښودلی خو تر دې وړاندې یې د پهلګام پېښې سره سم چې هند یې پړه پر پاکستان واچوله، د غندنې وړ وبلله او ټینګار یې وکړ، چې ورته پېښې د سیمې امنیت او ثبات ګواښي.
دا په داسې حال کې ده چې پر پاکستان د هند له برید وروسته د پاکستان د لومړۍ وزیر شهباز شریف په مشرۍ د یاد هېواد د ملي امنیت شورا بېړنۍ غونډه روانه ده څو پرېکړه وکړي، چې متقابل اقدامات به یې څه وي.
د هند پوځ د نن سهار په یوه خبري کنفرانس کې وویل، چې پاکستان کې یې یوازې د ترهګرو مرکزونه په نښه کړي او هېڅ نظامي یا ملکي تاسیس او ملکي وګړو ته یې زیان نه دی رسولی.
خو پاکستان دا ادعاوې رد کړې دي.
تازه د پاکستان د پوځ مشر، عاصم منیر هم په یوه خبري غونډه کې منلې چې پر پاکستان د هند تېرې شپې د بریدونو له امله شاوخوا ۲۶ ملکیان وژل شوي دي.
منیر زیاته کړې چې د برید پر مهال نه د پاکستان او نه هم د هند جنګي الوتکې د یو بل هوايي حریم نقض کړی او د یو بل خاورې ته نه دي ننوتي.