تاند(دوشنبه، د زمري/ اسد ۱۲ مه) په ټولنیزو رسنیو او ګڼو رسنیو کې په دې وروستیو کې داسې اوازې خپرې شوي چې ګواکي کریستیانو رونالډو او د هغه نامزادې جورجینا رودریګز د تېرې اوونۍ په پای کې واده کړی دی، خو تر اوسه دا ادعا رسماً نه ده تایید شوې.
د راپورونو له مخې، که واده واقعاً شوی وي، نو دا به د نړۍ د مشهورو شخصیتونو له تر ټولو پټو مراسمو څخه وي.
رونالډو څه ویلي وو؟
رونالډو د ۲۰۲۵ کال په وروستیو کې له بریتانیايي خبریال پیرس مورګان سره په مرکه کې ویلي و چې له جورجینا سره یې کوژده کړې ده.
هغه وویل: «ما د کوژدې لپاره ګوته (ګوتمۍ) اخیستې وه، یوه ملګري راته راوړې وه او زموږ لوڼې هم د دې شېبې شاهدانې وې. وروسته مې له جورجینا څخه د واده غوښتنه وکړه، ځکه احساس مې وکړ چې مناسب وخت دی.»
کله چې له هغه د واده د نېټې په اړه وپوښتل شول، رونالډو یوازې دومره وویل:
«واده به د نړیوال جام له پای او د اتلولۍ له جام وروسته ترسره شي.»
د واده اوازې څنګه پیل شوې؟
وروسته له هغه چې د پرتګال ملي لوبډله د ۲۰۲۶ نړیوال جام له سیالیو ژر ووته، د رونالډو او جورجینا د واده اوازې لا زیاتې شوې.
رسنیو راپور ورکړ چې جورجینا غواړي واده یې بیخي شخصي وي، او د اګست لومړۍ او دوهمه اوونۍ یې د مراسمو لپاره تر ټولو مناسب وخت ګڼل کېده، ځکه رونالډو باید د سپټمبر په میاشت کې له النصر لوبډلې سره تمرینونه پیل کړي.
ځینو پرتګالي رسنیو ادعا وکړه چې مراسم به د پرتګال په سینترا سیمه کې د Quinta da Regaleira په تاریخي ماڼۍ کې ترسره شي.
نورو رسنیو بیا لیکلي وو چې واده به د رونالډو په ټاټوبي مادیرا ټاپو کې وي، او حتی ادعا یې کړې وه چې د ټاپو لویه کلیسا او یو لوکس هوټل د همدې مراسمو لپاره ځانګړي شوي دي.
د شخصي الوتکې عکس هم اوازې زیاتې کړې
د جولای په ۲۸مه، رونالډو له خپلو ماشومانو سره د خپلې شخصي الوتکې یو عکس خپور کړ، چې له امله یې ځینو رسنیو اټکل وکړ ښايي واده د بالیار ټاپوګانو یا حتی په شخصي الوتکه کې ترسره شي.
خو وروسته څرګنده شوه چې دا یوازې د هسپانیا (پالما ډي مایورکا) ته د کورنۍ تفریحي سفر و.
د رونالډو خویندو اوازې رد کړې
د رونالډو کشرې خور کاتیا آویرو ویلي:
«د واده لپاره هېڅ ټاکلې نېټه نشته. سږ کال نه زه د واده جامې اغوندم او نه هم جورجینا.»
د هغه مشرې خور ایلما آویرو هم ویلي چې واده ځنډول شوی او لا معلومه نه ده چې نوی وخت به کله ټاکل کېږي.
سره له دې، ځینې رسنۍ لا هم باور لري چې ښايي دا څرګندونې یوازې د خلکو د پام اړولو لپاره وي او واده په پټه ترسره شي.
د رونالډو او جورجینا د اړیکو لنډه مخینه
رونالډو او جورجینا په مادرید کې په ګوچي پلورنځي کې سره وپېژندل، هغه مهال جورجینا هلته د پلور مرستیاله وه.
دواړو په ۲۰۱۷ کال کې خپلې اړیکې په رسمي ډول اعلان کړې.
په ۲۰۲۵ کال کې یې له نژدې نهو کلونو اړیکو وروسته کوژده اعلان کړه.
جورجینا د خپلې کوژدې د ګوتې عکس خپور کړ او ولیکل:
«هو، غواړم… په دې ژوند او په خپلو ټولو راتلونکو ژوندونو کې.»
ویل کېږي چې د هغې د کوژدې ۳۰ قیراطه الماسي ګوته له ۲ تر ۴.۵ میلیونه یورو ارزښت لري.
جورجینا د رونالډو د فوټبال په ټولو مهمو پړاوونو کې ورسره پاتې شوې؛ له ریال مادرید څخه تر یوونتوس، بیا مانچسټر یونایټډ او وروسته النصر پورې.
دغه جوړه له سختو شېبو هم تېره شوې، چې تر ټولو دردناکه یې په ۲۰۲۲ کال کې د خپلو غبرګو ماشومانو له ډلې د یوه ماشوم د زېږون پر مهال مړینه وه، خو خور یې بیلا اسمیرالدا نړۍ ته روغه راغله.