تاند【دوشنبه د ثور ـ غویي ۱۵مه】د امریکا ولسمشر ډونالډ ټرمپ ویلي، پر هغو فلمونو چې له امریکا د باندې تولیدېږي او بیا دغه هېواد ته واردېږي، ۱۰۰ سلنه تعرفه ولګوي.
ټرمپ پر خپلې ټولنیزې رسنۍ لیکلي، چې دا د نورو هېوادونو له لوري همغږې هڅه ده او دا یې د امریکا متحده ایالاتو ملي امنیت ته ګواښ هم بللی دی.
تر اوسه څرګنده نه ده، چې پر بهرنیو فلمونو به دغه تعرفې څنګه عملي کېږي، خو ټرمپ ویلي د امریکا فلمي صنعت ژور تدریجي مرګ تجربه کوي ځکه چې نور هېوادونه د فلم جوړونکو د جلب لپاره مالیاتي اسانتیاوې برابروي.
د یادونې ده چې په تېرو کلونو کې فلمونه او تلویزیوني پروګرامونه له هالیووډ بهر هغو هېوادونو ته لېږدول شوي، چې هلته د مالیاتو تخفیف او نور مالي امتیازات موجود دي.
له دغو فلمونو ډېری یې په کاناډا، برتانیا، استرالیا او مرکزي اروپا کې تولیدېږي.
بل لورته یو شمیر رسنۍ د د ProdPro په نوم د یوې څېړنیزې ادارې په حواله وایي، چې په ۲۰۲۳ کال کې شاوخوا نیمايي د هغو فلمونو او تلویزیوني پروژو بودیجه چې له ۴۰ ملیونو ډالرو پورته وه له امریکا د باندې لګول شوې ده.
سرچینې زیاته کړې، چې په دې سره امریکا کې د فلم تولید ۴۰ سلنه کم شوی دی.
د هالیوډ چارواکو تر اوسه څه نه دي ویلي.