تاند【یکشنبه د ثور ـ غویي ۱۴مه】پاکستاني رسنۍ د پاکستان او افغانستان د سوداګرۍ او صنایعو د ګډې خونې په حواله راپور کې ویلي، چې پاکستان هغو لاریو ته اجازه نه ده ورکړې کوم چې، هندي وارداتي توکي لیږدوي او افغانستان ته ننوځي.
د هند وارد شوي توکي پخوا د ټرانزیټ تړون پر بنسټ د واګه بندر او تورخم او چمن له لارې افغانستان ته داخلېدل.
د پاکستان او افغانستان د سوداګرۍ او صنایعو د ګډې خونې مشر خان جان الکوزي ډان ورځپاڼې ته ویلي،چې پاکستان دا اقدام وروسته له هغه وکړ چې هند د واګه بندر له لارې د افغانستان صادراتي توکو بار لاریو ته د تېرېدو اجازه ورنه کړه.
د پاکستان او هند ترمنځ د کړکېچ زیاتېدو لامل د همد تر ولکې لاندې کشمیر کې د ۲۶ هندي سیلانیانو وژل کېدل دي، چې هند یې مسوولیت پر پاکستان اچوي.
دواړه لورو پر یو بل سخت محدودیتونه وضع کړي، آن پر یو بل د برید تر ګواښه هم رسېدلي دي.
د هندي رسنیو د راپور له مخې، هند تازه د پهلګام برید وروسته له پاکستان څخه پر هر ډول مستقیمو او غیر مستقیمو وارداتو بندیز اعلان کړی دی.
د راپور له مخې د هند د سوداګرۍ وزارت دا پرېکړه د ملي امنیت د خوندیتوب په دلیل کړې او ویلي یې دي، چې بندیز به تر راتلونکو پرېکړو پورې نافذ وي.
په ورته وخت کې د هند د بهرنۍ سوداګرۍ ادارې هم ویلي، هر ډول استثنا به یوازې د حکومت په ځانګړې منظورۍ ممکنه وي.