تاند (دوشنبه، د وري/ حمل ۱۸) د ایران د رضوي خراسان ولایت د تایباد د عامه او انقلاب څارنوالۍ اعلان کړی چې په تېر کال کې، د ۲۰۲۳ کال په پرتله، ایران ته د ناقانونه افغان کډوالو د داخلېدو په هڅو کې ۵۰ سلنه کموالی راغلی دی.
د تایباد د څارنوال، حجت صادقي، په وینا، د ایران په ختیځه پوله کې میشتو وسلهوالو ځواکونو د تایباد له پولهيیزې دروازې څخه د ایران خاورې ته تر داخلېدو مخکې ۳۳,۵۸۲ افغان وګړي نیولي او مخه یې نیولې ده.
نوموړي په پوله کې پر له پسې امنیتي تدابیر، د پوځیانو حضور او ځواک، د قضایي ادارو له خوا اغېزمن قانوني اقدامات، د ختیځې پولې د دېوال د لویې پروژې نسبي تطبیق، او د ملي او ولایتي ادارو همغږي د ایران خاورې ته د افغان کډوالو د اوښتو د کمېدو عوامل وبلل.
صادقي زیاته کړه چې ټول نیول شوي کسان، له قانوني پروسو وروسته، د دوغارون نړیوالې دروازې له لارې بېرته افغانستان ته استول شوي دي.
هغه دا هم څرګنده کړه چې په ایران کې د نیول شوو افغانانو دوسیې، چې د هېواد په ۱۱ ولایتونو کې نیول شوي، په منظم ډول دوغارون ته لېږدول کېږي، او هلته د قانوني مراحلو له بشپړېدو وروسته د افغان چارواکو لاس ته سپارل کېږي.
صادقي د سرحدي امنیت پر اهمیت ټینګار وکړ او ویې ویل چې دوغارون د افغان وګړو لپاره د قانوني تګ راتګ اصلي لاره ده، او خبرداری یې ورکړ چې له پولې هر ډول ناقانونه اوښتل به له جدي قانوني چلند سره مخامخ شي.