تاند (یکشنبه، د وري/ حمل ۱۰ مه) د افغانستان د کرکټ د ۱۹ کلنو ملي لوبډله نن (یکشنبه) سهار نیپال ته روانه شوه، څو د کوربه هېواد پر وړاندې درې یو ورځنۍ لوبې ترسره کړي.
د افغانستان کرکټ بورډ په خپله فیسبوکپاڼه کې لیکلي چې د هېواد د ۱۹ کلنو کرکټ ملي لوبډله نیپال ته تللې، څو د نیپال د ۱۹ کلنو ملي لوبډلې پر وړاندې درې یو ورځنۍ لوبې وکړي.
همداراز، کرکټ بورډ ویلي، چې افغان لوبډله به هلته د ۱۹ کلنو نړیوال جام د غوراوي په سیالیو کې هم ګډون وکړي.
ټاکل شوې چې افغان لوبډله خپله لومړنۍ یو ورځنۍ لوبه د پنجشنبې په ورځ د نیپال پر وړاندې وکړي.