تاند (چهارشنبه، د وري/ حمل ۶مه) په افغانستان کې د ملګرو ملتونو د مرستندوی ماموریت (UNAMA) مشره روزا اوتونبایوا، د طالبانو د بهرنیو چارو له سرپرست وزیر سره په کتنه کې ویلي چې ملګري ملتونه د افغانستان د روانو بانکي او خصوصي سکتور د ستونزو د حل لپاره کار کوي.
دا خبره د طالبانو تر کنټرول لاندې د بهرنیو چارو وزارت د چهارشنبې په ورځ په یوه بیان کې کړې ده.
په خبرپاڼه کې راغلي چې اوتونبایوا په کابل کې له امیرخان متقي سره لیدلي او د اقتصادي او بشري مرستو په ګډون، د مخدره موادو د کنټرول په اړه یې خبرې کړي دي.
د طالبانو د معلوماتو له مخې، اوتونبایوا له متقي سره په کتنه کې د ملګرو ملتونو امنیت شورا ته د خپلو وروستیو څرګندونو او همداراز د UNAMA د ماموریت د تمدید په اړه معلومات ورکړي.
وزارت وايي، متقي له ملګرو ملتونو سره همکارۍ ته چمتووالی ښودلی، خو ټینګار یې کړی چې دا سازمان باید د طالبانو نظرونږ ته درناوی وکړي. د متقي له قوله ویل شوي:«که زموږ لیدلوري ته پام وشي، موږ د بېلابېلو برخو په اړه د همکارۍ لپاره تیار یو.»