تاند (چهارشنبه، د وري/ حمل ۶ مه) د طالبانو د حکومت ویندوی ذبیح الله مجاهد، کابل ته د امریکایي پلاوي سفر ته په اشارې وویل چې د طالبانو چارواکو د ډونالډ ټرمپ له استازي سره په واشنګټن کې د طالبانو حکومت ته د افغانستان د سفارت د سپارلو په شمول په بېلابېلو موضوعاتو خبرې کړې دي.
ښاغلي مجاهخد پرون (سې شنبې) د سعودي عربستان له العربیه شبکې سره په مرکه کې وویل چې له امریکایي چارواکو څخه یې غوښتنه کړې چې په واشنګټن کې د افغانستان سفارت طالبانو ته وسپاري او همداراز، د امریکا سفارت په کابل کې بېرته پرانیزي.
مجاهد وویل چې طالبان د امریکایي پلاوي د ځواب په انتظار کې دي.
تېره اوونۍ، یو امریکایي پلاوی چې مشري یې د ډونالډ ټرمپ د برمته نیوونکو چارو سلاکار، آدم بولر کوله، او د افغانستان لپاره د امریکا پخوانی استازی زلمی خلیلزاد، هم ورسره و، کابل ته سفر وکړ.
د دې سفر په تعقیب، طالبانو یو امریکایي برمته خوشي کړ. امریکایي پلاوي په کابل کې د طالبانو د بهرنیو چارو له وزیر امیرخان متقي سره وکتل، خو ځینې سرچینې وايي چې دا پلاوی له کابل څخه مخکې کندهار ته تللی و او هلته یې د ملا هبتالله اخوندزاده له نژدې کسانو سره لیدلي وو.
له دې سفر وروسته، امریکا د طالبانو د کورنیو چارو وزیر، سراجالدین حقاني، او د حقاني شبکې د دوو غړو د نیولو لپاره ټاکل شوی انعام لغوه کړ.
ذبیحالله مجاهد د سراج الدین حقاني او د هغه د دوو نورو ملګرو پر سر د جایزې د لیري کېدو په اړه وویل چې د امریکا حکومت د جورج ګلزمن د خوشې کولو په غبرګون کې «ګامونه پورته کړي، چې پکې د اسلامي امارت د ځینو مشرانو د نیولو د جایزو لغوه کېدا شامله ده.»
د طالبانو ویاند د امریکا دا پرېکړه د اړیکو د ښهوالي په لور یو مثبت ګام وباله.
نوموړي په خپلو خبرو کې ټینګار وکړ چې د افغانستان سفارت باید په امریکا کې بېرته پرانیستل شي، ځکه چې سفارت افغان اتباعو ته د قونسلي خدماتو د وړاندې کولو په خاطر ضروري دی.
مجاهد همداراز په کابل کې د امریکا د سفارت د بېرته پرانیستلو غوښتنه وکړه او ویې ویل: «موږ هیله لرو چې د دواړو هېوادونو ترمنځ اړیکې او همکاري د متقابلو ګټو پر بنسټ مطلوبې کچې ته ورسېږي.»
امریکا د۲۰۲۱ کال په اګست کې له افغانستان څخه له وتلو سره سم په کابل کې خپل سفارت بند کړ. د دې هېواد ډیپلوماټان د افغانستان اړوند مسایل له قطر څخه څاري.
ذبیحالله مجاهد وویل چې امریکایي پلاوی د طالبانو له غوښتنو سره بېرته متحدو ایالتونو ته ستون شوی. هغه زیاته کړه چې طالبان د امریکا راتلونکي ګام ته سترګې په لار دي.
نوموړي ټینګار وکړ: «افغانستان چمتو دی چې ښې اړیکې ولري، او لکه څنګه چې مخکې مې وویل، موږ له ټولو هېوادونو، په ځانګړې ډول له متحدو ایالتونو سره د ښو اړیکو غوښتونکي یو.»
متحدو ایالتونو د محمودشاه حبیبي، چې افغان- امریکایي وګړی دی او د افغانستان د ملکي هوايي چلند ادارې پخوانی رئیس پاته شوی، د خوشې کېدو غوښتنه کړې.
سره له دې چې ډونالډ ټرمپ د جنورۍ په شلمه له واک ترلاسه کولو وروسته د نړۍ له هیوادونو او سترو سازمانونو سهر د امرکیا مرستې تر ډېره ودرولې، خو ویل کېږي چې لا هم افغانستان ته هره اوونۍ لسګونه میلون ډالره رالیږي. ځینې کتونکي د امریکا دا مرستې د دې ښکارندويې بولې چې امریکا لا هم افغانستان ته اهمیت ورکوي.