تاند【یکشنبه د حمل ـ وري ۳مه】د طالبانو د حکومت د صنعت او سوداګرۍ وزارت په یوه خبرپاڼه کې ویلي، چې د ۱۴۰۲ کال پرتله په ۱۴۰۳ کال کې د وارداتو او صادراتو کچه لوړه شوې ده.
سرچینه زیاتوي چې دا چاره په هېواد کې د خلکو د پېرودنې د ځواک او ودې ښودنه کوي.
په خبرپاڼه کې راغلي چې په ۱۴۰۳ کال کې د افغانستان صادرات ۱ ملیارد او ۷۸۵ ملیون ډالرو ته رسېدلي، چې د واردات کچه یې ۱۱ ملیارد او ۱۶۴ ملیون ډالر ته لوړه شوې ده.
د مالوماتو له مخې افغانستان زیاته برخه صادرات پاکستان، هند، متحده عربي اماراتو، ازبکستان، ایران، قزاقستان، چین، ترکیې، عراق او تاجکستان ته کړي دي.
د سرچینې په وینا په دغه کال کې افغانستان له ایران، متحده عربي اماراتو، پاکستان، چین، ترکمنستان، ازبکستان، قزاقستان، روسیې، هند او مالیزیا واردات کړي دي.