تاند (شنبه، د کب/ حوت ۲۵ مه) په ملګرو ملتونو کې د پاکستان دایمي استازی منیر اکرم، وايي چې هېواد یې غواړي له تروریزمه د هند او طالبانو د ملاتړ پر ضد ملګروملتو ته یو پرېکړه لیک وړاندې کړي.
اکرم زیاته کړې چې په دې شکایت کې به هند او طالبان د افغانستان له خاورې څخه د تروریزم په صادرولو کې په رول لرلو تورن کړي
هغه ټینګار کړی چې راتلونکی ګام به په ملګروملتو کې له تروریزم څخه د هند د ملاتړ افشا کول وي.
ده دا حرګندونې وروسته له دې وکړې چې د بلوچستان د ازادۍ پوځ په یوه کمساري اقدام کې له کوټې څخه پېښور ته د یوه تلونکي ریلګاڼډي مخه ونیوله، په هغه کې سپاره پوځیان او نور امنیتي ځواکونه یې له ساعتونو برمته نیولو وروسته ووژل.
دې پېښې په پاکستان کې د امنیت د ټینګښت په برخه کې د حکومت او امنیتي ادارو پر پاتې راتلو ډېرې نیوکې وشوې.
د پاکستان پوځ او د باندنیو چارو وزارت د دغو نیوکو په منځ کې سمدستي وویل چې حمله کوونکو په افغانستان کې له خپلو طراحانو سره د مخابرې له لارې تماس درلود.
د طالبانو حکومت او هند د بلوچستان په برید کې هر ډول لاس لرل رد کړي دي.