تاند (شنبه، د کب/ حوت ۲۵ مه) د طالبانو تر کنټرول لاندې د افغانستان د مخابراتو او معلوماتي ټکنالوژۍ وزارت وايي چې تر اوسه په ټول افغانستان کې ۱۸ میلیونه سیمکارتونه ثبت شوي دي.
دباختر خبري اژانس نن (شنبې) د دغه وزارت د ویندوی عنایتالله الکوزي، له قوله وویل چې په افغانستان کې د ټولو مخابراتي شرکتونو ټول سیمکارتونه ۲۶ میلیونو ته رسیږي چې د هغو له منځه ۱۸ میلیونه تراوسه ثبت شوي او د پاته سیمکارتونو د ثبت بهیر دوام لری.
عنایتالله الکوزي همداراز ویلي چې په افغانستان کې د سیمکارتونو د ثبت بهیر د مخابراتو وزارت لهخوا څارل او مدیریت کېږي.
د مخابراتو او معلوماتي ټکنالوژۍ وزارت مخکې له ټولو مخابراتي شرکتونو غوښتي وو چې د مخابراتي سیمکارتونو د ثبت د کړنلارې له مخې، د خپلو مشتریانو سیمکارتونه ثبت کړي.
د افغانستان پخواني حکومت هم د امنیت د تامین او د سیمکارتونو د ثبت هڅه کړې وه، خو دا بهیر بریالی نه شو.