تاند【چهارشنبه د کب ـ حوت ۲۲مه】د ایرلنډ کرېکټ بورډ مسوولان وايي، له افغانستان سره د مالي ستونزو له امله پلان شوې لوبې نشي کولای.
کرېک انفو ویب پاڼې د دغه هېواد د کرېکټ بورډ د رییس، وارېن دیوتروم له قوله ویلي، دا پرېکړه د هغوی د لنډمهاله بودیجوي محدودیتونو د تنظیم له امله شوې ده.
سرچینې زیاته کړې چې ایرلنډ روان کال ډېر بوخت مهال ویش لري او ګڼې لوبې یې پلان کړي دي.
د سرچینې په وینا یاد هېواد له همدې امله افغانستان سره د لوبو نه کولو پرېکړه کړې چې یو سیاسي نه بلکې مالي لامل لري.
افغان کرکټ بورډ په دې تړاو لا رسمي څه نه دي ویلي.
افغانستان له ایرلنډ سره د کرېکټ په بېلابیلو فارمټونو کې لوبېدلی او په ټولو فارمټونو کې دواړه لوبډلو سختې سیالۍ کړې دي