تاند【یکشنبه د کب ـ حوت ۱۹مه】د افغانستان – پاکستان د سوداګرۍ ګډه خونه وایي، نن (یکشنبه د کب ۱۹مه) به د تورخم لارې د پرانیستې په موخه د افغانستان او پاکستان د سوداګرۍ خونو او سوداګرو ترمنځ جرګه وشي.
دغې خونې د دې جرګې بله موخه د ډېورنډ پر فرضي کرښې اوربند یاد کړی دی.
د سرچینې د معلوماتو له مخې په دغه جرګه کې به د دواړو خواو دولتي استازي ګډون ونه کړي.
شاوخوا د ۱۶ ورځو په تېرېدو لاهم د تورخم دروازه تړلې ده.
د یادې دروازې د تړلو پر سر دړاړه لوریو سختې نښتې وکړې او دواړه لوریو ته مرګ ژوبله هم واوښته.
د وړمې ورځې په نښته کې افغان لوري ته د درېیو خبریالانو ترڅنګ یو شمېر افغان طالب پوله ساتي هم ټپیان شوي دي.
یوه افغان سوداګر د نوم نه خپراوي په شرط تاند وېب سایټ ته وویل، چې د تورخم دروازې بندېده دواړه غاړه سوداګرو ته سخت مالي زیانونه اړولي دي.
سرچینه زیاتوي یاده لار د جګړې پرمټ نه بلکې د خبرو اترو له لارې پرانیستل کېږي.
له نښتو سره سره دواړه لوریو د تورخم دروازې د خلاصون په اړه څو ځلې ناسته هم وکړه خو بې پایلې شوه.
تېره چهارشنبه افغان سولې لپاره د امریکا پخواني ځانګړي استازي زلمي خلیلزاد هم د تورخم نښتو ته په اشارې ویلي وو چې، اسلام اباد او کابل باید دیپلوماسي غوره کړي نه جګړه.
وبه لیدل شي د دواړه لورو سوداګرۍ ګډه خونه به هوکړې ته ورسېږي او که نه.