تاند【شنبه د کب ـ حوت ۱۷مه】 د پښتو ژبې مشهوره سندرغاړې ښاپېرۍ نغمه د مارچ اتمې په مناسبت په یوه وېډیویي پیغام کې افغان نجونو ته د ښه ژوند هیله کړې ده.
هغه زیاته کړې: “اتم د مارچ د نړۍ ټولو په ځانګړي ډول د خپل وطن زورېدلو او کړېدلو میندو ته مبارکي وایم. هیله لرم چې زموږ د ګران وطن خویندې میندې هم لکه د نورو وطنونو د ښځو په څېر له حق حقوق نه برخورداره شي.”
ښاپېرۍ نغمې په پیغام کې هیله کړې چې افغان نجونو پرمخ د تعلیم تړلې دروازې خلاصې او دوی خپلو نیمګړو هیلو ته ورسېږي.
بل لورته نن د مارچ اتمه،په ټوله نړۍ کې د ښځو د پیوستون په نامه نمانځل کېږي.
په دې مناسبت د بېلابېلو هېوادونو د مشرانو، نړیوالو ادارو او فعالانو د پیغامونو په سر کې له افغان ښځو سره د طالبانو د حکومت د چلند یادونه کړې ده.
د بشري حقونو د څار سازمان د ښځو د څانګې مرستیالې هیدربار رسنیو ته ویلي چې، دوی د افغان ښځو د حقونو له پلوه ډېره اندېښنه لري.
د نوموړې په وینا “سږکال چې موږ د ښځو نړیواله ورځ نمانځو، د بشري حقونو د څار سازمان په ځانګړي ډول په ټوله نړۍ کې د استبداد له لوري د ښځو حقونو ته پر ورپېښ ګواښ تمرکز کوي”.