تاند【شنبه د کب ـ حوت ۱۸مه】د هېواد پخواني ولسمشر حامد کرزي اتم د مارچ د ښځو نړیوالې ورځې په مناسبت یوه پېغام کې ویلي، د ښځو لپاره باید د پرمختګ او فعاله ګډون زمینه برابره شي.
حامد کرزي دغه پېغام کې ویلي، د افغانستان حال او راتلونکی د ښځو مانا لرونکي ګډون ته اړتیا لري.
نوموړې د طالبانو له سرپرست حکومته غوښتي چې د نجونو پر مخ د ښوونځیو او پوهنتونونو دروازې پرانیزي.
پخواني ولسمشر د ازادي غوښتونکو مبارزو، فرهنګي ودې او ټولنیزو بدلونونو په برخه کې د ښځو رول ستایلی او ویلي یې دي چې، دوی (ښځو) د هېواد د ابادۍ او پرمختګ لپاره د نارینهوو ترڅنګ، خپل رسالت په ښه توګه ادا کړی دی.
کرزی داسې مهال د نجونو پرمخ د تعلیم دروازې د پرانیستې غوښتنه کوي چې، د طالبانو د حکومت ویاند تازه ویلي، په افغانستان کې ښځې له فزیکي او رواني اړخه خوندي دي.
ذبیح الله مجاهد د ښوونیزو دروازو د پرانستې په اړه څه نه دي ویلي.
بل لورته د هېواد مشهورې سندرغاړې نغمې هم هیله ښودلې چې، افغان نجونې به د تعلیم او کار حقونه ترلاسه کړي.