تاند ( دوشنبه د زمري ـ اسد ۱۲مه) د متحده عربي اماراتو د درمل جوړونې شرکت جلفار فارما (PJSC) افغانستان کې د درملو له یوه کورني شرکت سره د همکارۍ او درملو د وېش تړون لاسلیک کړی دی.
د دغه تړون ارزښت ۸۷ میلیونه امریکایي ډالر ښودل شوی دی.
د تړون له مخې، دواړه شرکتونه به افغانستان کې د طالبانو د حکومت او نافذه ملي او نړیوالو قوانینو په پام کې نیولو سره په کور دننه درمل او روغتیايي خدمتونه وړاندې کوي.
جلفار فارما په ۲۰۰۳ کال کې افغانستان ته د درملو صادرات پیل او په ۲۰۱۸ کال کې یې خپل فعالیت درولی و.
دغه شرکت به اوس د درملو له یاد کورني شرکت سره د نوي تړون له مخې یو ځل بیا افغانستان ته د درملو صادرات پیل کړي.
دا تړون په داسې حال کې شوی چې، د افغانستان او پاکستان ترمنځ سوداګریزه راکړه – ورکړه ختمه شوې او هېواد د باکیفیته درملو له اړتیا سره مخ دی.