تاند (پنجشنبه، د کب/ حوت ۹ مه) د طالبانو حکومت له ترکمنستان سره د اووه میلیون ډالرو په ارزښت د ریللارې د جوړېدو په اړه درې قراردادونه لاسلیک کړل.
د طالب چارواکو په وینا، د دې قراردادونو هدف د افغانستان د رېل پټلۍ پراخول او د سیمهییزو سوداګري اړیکو پیاوړتیا ده.
د ټولګټو وزارت مرستیال محمد اسحاق صاحبزاده دا قراردادونه د ترکمنستان د سفر په ترڅ کې لاسلیک کړل.
د طالبانو تر ادارې لاندې باختر خبري آژانس د راپور له مخې، په دې پروژو کې د هرات-تورغونډۍ د ریلګاډي د تمځای پراخول، د آقینه-اندخوۍ د ۱۰ کیلومتره پټلۍ بشپړول، او د اندخوۍ-شبرغان ترمنځ د ۵۵ کیلومتره وړاندیز شوې ریللارې د امکانسنجۍ څېړنې شاملې دي.
تېره اوونۍ د طالبانو ویاند ذبیحالله مجاهد په ټولنیزو رسنیو کې اعلان وکړ چې د کندهار-هرات د ۷۳۷.۵ کیلومتره ریللارې د څېړنو او ډیزاین کارونه هم پیل شوي دي.