تاند (شنبه، د سلواغې/ دلوې ۲۷ مه) هغه افغان او پاکستاني رضاکار جنګیالي، چې د ایران د سپاه پاسداران په ملاتړ د بشار اسد د رژیم د ملاتړ لپاره په سوریه کې ځای پر ځای شوي وو، د اسد د رژیم له پرزېدو وروسته عراق ته تللي دي. یو شمېر عراقیان په دې خاطر اندېښنه لري. د دوی د اندېښنې علت ته عرب نیوز په دې راپور کې کتنه کړې:
————–
د نیوزعرب د راپور له مخې، هغه افغان او پاکستاني جنګیالي، چې پخوا یې په سوریه کې د بشاراسد د رژیم په ننګه جګړه کړې وه، د اسد د رژیم له نسکورېدو وروسته عراق ته تللي دي. دا چاره سبب شوې چې د عراق پارلمان په دې اړه پلټنې وکړي.
په عراق کې اندېښنې زیاتې شوې دي چې یاد جنګیالي ښايي د ایران تر ملاتړ لاندې له عراقي وسلوالو ډلو سره یوځای شي.
د عراق یوه امنیتي چارواکي العربي الجدید ته ویلي چې دا بهرني جنګیالي د دسمبر په ۷ او ۸ عراق ته داخل شوي دي.
د فاطمیون او زینبیون جنګیالي
دوی اصلاً په فاطمیون او زینبیون فرقو پورې تړلي دي، چې د ایران د سپاه پاسداران له خوا جلب او جذب شوي وو. دوی د ۲۰۱۱ کال له جګړې راهیسې د اسد د رژیم په ملاتړ کې مهم رول درلود.
که څه هم عراقي امنیتي چارواکو د دې جنګیالیو شمېر کم بللی، خو د دوی موجودیت د پارلمان غړي اندېښمن کړي دي.
د پارلمان غبرګون
د عراق د پارلمان غړي عدنان الزرفي د پنجشنبې په ورځ خبرداری ورکړ چې یادې وسلوالې ډلې په نړیوال “ترهګریز” لیست کې شاملې دي.
«دا ډلې د ترهګرو سازمانونو په توګه ثبت شوي، خو بیا هم د عراق حکومت دوی ته د پاتې کېدو اجازه ورکړې ده. دا چاره د عراق امنیت ته جدي ګواښ پېښوي.»
هغه د عراق چارواکي تورن کړل چې دا ډلې ساتي، او زیاته یې کړه چې د دوی اصلي هېوادونه هم د دوی د بېرته منلو مخالف دي.
د پارلماني پلټنې اعلان
د عراق د پارلمان د امنیت او دفاع کمېټې غړي یاسر وتوت (وطوط) د جمعې په ورځ اعلان وکړ چې پارلمان به د دې مسلې پلټنه پیل کړي.
«د غیر عراقي وسلوالو ډلو شتون د منلو نه دی او د عراق امنیت ته مستقیم ګواښ پېښوي.»
له دې قضیې سره بلد قانون جوړونکي به د عراق له استخباراتي ادارې سره کار وکړي، څو دا ادعاوې تصدیق کړي او په عراق کې د بهرنیو وسلوالو فعالیتونه وڅېړي.
د امریکا او اسراییلو احتمالي بریدونه
یاسر وتوت زیاته کړه:
«دا موضوع امریکا یا اسراییل ته پلمه په لاس ورکولی شي چې د عراقي پر خاوره بریدونه وکړي. موږ به دا راپورونه وڅېړو او په دې اړه به روښانه دریځ غوره کړو.»
د سیاسي مشرانو اندېښنې
ځینو عراقي سیاستوالو خبرداری ورکړی چې د دغو ملیشو موجودیت عراق د امریکا او اسراییل د احتمالي بریدونو له ګواښ سره مخامخولی شي.
عبدالرحمن الجزایري، چې د پخواني لومړي وزیر نوري المالکي په مشرۍ د دولت القانون ائتلاف غړی دی، دا وضعیت “خطرناک” او “ستراتیژیکه تېروتنه” وبلله.
«دا ډلې ښايي د امریکا او اسراییل د بریدونو هدف وګرځي، او عراق به یوې داسې نظامي شخړې ته ورکاږي چې د زغملو وس یې نه لري.»
د حکومت رسمي انکار
که څه هم حکومت د بهرنیو جنګیالیو له شتونه انکار کړی، عبدالرحمن الجزایري ټینګار کړی چې دا وسلوال په عراق کې شته، خو ښايي د غیر رسمي وسلوالو ډلو په مرکزونو کې ځای پر ځای وي، نه د عراق په رسمي پوځي جوړښت کې.
د عراق امنیتي وضعیت ته جدي ګواښ
الجزایري خبرداری ورکړ:
«د عراق داخلي امنیت له جدي خطر سره مخامخ دی. حکومت باید سمدلاسه اقدام وکړي او مخکې له دې چې هېواد نور هم بېثباته شي دا ډلې له هېواده وباسي.»