تاند【دوشنبه د سلواغې ـ دلوې ۲۲مه】اسوشیتډپرېس خبري اژانس په یوه راپور کې ویلي، چې د امریکا د ولسمشر ډونالډ ټرمپ فرمان، چې د پناه غوښتونکو د منلو بهیر یې ځنډولی، پکې امریکا په تمه افغانان هم شامل دي.
سرچینه زیاتوي، چې دغه افغانان اوس له ناڅرګند برخلیک سره مخ دي.
د راپور له مخې، ځینې دغه کسان په پاکستان، قطر او البانیا کې پاتې دي.
ډونالډ ټرمپ له بیا واک ته رسېدو وروسته، د یوه اجرایي فرمان په لاسلیکولو سره د پناه غوښتونکو د منلو بهیر وځنډوه.
دا په داسې حال کې ده چې بل لورته رویټرز خبري اژانس په یوه راپور کې ویلي، چې د افغان کډوالو د ایستلو د پروګرام مشر، شان وېنډیوار د امریکا د بهرنیو چارو وزارت له یو لیک استولی.
په دې لیک کې د امریکا د بهرنیو چارو له وزیر غوښتنه شوې، چې د افغان متحدینو ملاتړ ته دوام ورکړي، که نه په خبره یې د هغوی ژوند به لا زیات ګواښ سره مخ شي.
سرچینه د لیک د محتوا پر اساس زیاته کړې، چې دا به په راتلونکو جګړو کې د امریکايي ځواکونو باور ته زیان ورسوي.
بل لورته بیا د امریکا د پخوانیو نظامیانو یو ډلې هم له بهرنیو چارو وزارته ورته غوښتنه کړې ده.
د امریکا بهرنیو چارو وزارت د دغه لیک په اړه تر دې دمه څه نه دي ويلي.