تاند (دوشنبه، د سلواغې/ دلوې ۲۲ مه) د امریکاپه متحدو ایالتونو کې د جنوبي افریقا سپین پوستو ته د پناه ورکولو په اړه د ولسمشر ډونالډ ټرمپ وړاندیز رد کړ د جنوبي افریقا د سپین پوستو له هرکلي سره مخامخ نه شو.
ټرمپ د جمعې په ورځ د جنوبي افریقا د ولسمشر سیریل رامافوسا لهخوا د “ملکیت د سلب” قانون لاسلیک “بېعدالتي” وبلله او په غبرګون کې یې د امریکا د مرستو د بندولو لپاره یو اجرايي فرمان لاسلیک کړ.
سیریل رامافوسا دا قانون تېره میاشت د ځمکو د ملکیت د نابرابرۍ د جبران لپاره لاسلیک کړی و، چې ریښې یې د جنوبي افریقا د سپینپوستو د برلاسۍ دورې ته ورګرځي.
د ټرمپ په فرمان کې راغلي چې د جنوبي افریقا “افریکانر” سپینپوستي، چې د “ناعادلانه توکمیز تعصب” قربانیان دي، اوس کولای شي امریکا ته د پناهغوښتونکو په توګه ولاړ شي.
“افریکانر” هغه سپینپوستي دي چې د لومړنیو اروپايي کډوالو اولادونه دي، او زیاتره یې له هالنډ او فرانسې افریقا ته تللي وو، او د جنوبي افریقا د کرنیزو ځمکو لویه برخه یې په واک کې ده.
۷۸ کلن (نویل ون در مروي)، چې د کیپټاون په شاوخوا کې اوسي، وايي: «کله چې دلته کومه ستونزه نهلرو، ولې باید ولاړ شو؟»
هغه د نوي قانون د تصویب په اړه وايي: «زموږ له ځمکو سره هیڅ بد کار نهدی شوی، او خلک خپل کارونو ته په عادي ډول دوام ورکوي.»
دا قانون د ځمکې د ملکیت په برخه کې د نژادي نابرابرۍ د لهمنځه وړلو لپاره تصویب شوی، په داسې حال کې چې د دې هېواد په څلورو کې درې برخې شخصي ځمکې د سپینپوستي لږکي په لاس کې دي. قانون د دې اسانتیا برابروي چې دولت د عامه ګټو لپاره د ځمکو مالکیت سلب کړي.
د رسمي شمېرو له مخې، سپینپوستي د جنوبي افریقا د ۶۳ میلیوني نفوس ۷.۲ سلنه جوړوي؛ خو دا شمېرې د “افریکانر” ټول وګړې نه دي مشخص کړي.
ټرمپ په داسي حال کې د جنوبي افریقا سپین پوستو ته بلنه ورکړه چې امریکا ته مهاجرت وکړي، چې امریکا ته یې د شاوخوا ۴۰ زره افغانانو د انتقال مخه نیولې ده.