تاند (یکشنبه، د سلواغې/ دلوې ۲۱ مه) یو ایټالوی ډاکټر د خپلې پیشو د سي‌ټي‌ سکن او جراحۍ له امله، چې په خپل کاري روغتون کې یې ترسره کړې وه، له قانوني تحقیقاتو لاندې سره مخامخ شوی دی.

د پېښې تفصیل

جانلوکا فانلي، چې د ایټالیا یو رادیولوژیست دی، شاوخوا یوه میاشت مخکې خپله دوه کلنه پیشو “آتنا” هغه وخت روغتون ته یووړه چې له شپږ‌پوړیزې ودانۍ څخه ولوېده او سخته ژوبله شوه.

هغه پیشو د امبرټو پاریني روغتون ته، چې د ایټالیا د شمال په آوستا سیمه کې موقعیت لري، یووړه چې ژوند یې وژغوري.

قانوني پلټنې او روغتوني تحقیقات

د روغتون مدیر ویلي چې دا موضوع په داخلي توګه ارزول کېږي او د لا زیاتو تحقیقاتو لپاره یې دوسیه د آوستا څارنوالۍ ته لېږلې ده.

د فانلي دفاع

فانلي روغتون ته په خپل لیکلي پیغام کې ویلي:
“آتنا د مرګ او ژوند ترمنځ وه، یوازینی حل دا و چې فوري مداخله وشي.”

هغه د پېښې په ورځ د پیشو سي‌ټي‌سکن وکړ، بیا یې پنوموتوراکس جراحۍ ترسره کړه او د هغې له سږو یې مایعات وایستل چې بېرته ساه واخلي.

فانلي وویل:
“که ما دا کار نه وای کړی او پیشو مې مړه شوې وای، هېڅکله به مې ځان نه وای بښلی، په ځانګړي ډول ځکه چې اولادونه مې ورسره ډېره مینه لري.”

د روغتون غبرګون

ماسیمو اوبرتي، چې د امبرټو پاریني روغتون مدیر دی، وویل:
“دا کیسه دومره عجبه وه چې ما اول فکر وکړ چې د ټوکو او مسخرو خبر دی، خو بدبختانه داسې نه وه. اوس موږ ټول احتمالي سرغړونې څېړو.”

قانوني خطرونه او تورونه

څارنوالانو ویلي فانلي ممکن له عامه بودجې د ناسمې استفادې او ناروغانو ته د ضروري خدماتو نه ورکولو له تورونو سره مخامخ شي.

خو فانلي دفاع کړې، ویلې یې دي چې د سي‌ټي‌سکن ماشین یې د شپې ناوخته کارولی، کله چې هیڅ ناروغ نه و ثبت شوی او ماشین بېکاره ولاړ و.

هغه لیکلي:
“زه بخښنه غواړم که زما کار کومه مقرره ماته کړې وي، که اړتیا وي، زه چمتو یم چې د روغتون لګښتونه ورکړم.”

د فانلي د مېرمنې ملاتړ

نیکولتا سپلګاتي، چې د فانلي مېرمن او د ایټالیا د افراطي ښي‌لاسې “لیګ” ګوند سناتوره ده، د خپل مېړه ملاتړ کړی.

هغې ایټالیايي رسنیو ته ویلي:
“په ژوند کې باید سم کار وشي، پرته له دې چې د پایلو په اړه یې اندېښنه وشي. زما مېړه یو ژوندی موجود وژغوره!”