تاند (یکشنبه، د سلواغې/ دلوې ۲۱ مه) د افغانستان د ترانسپورت او هوايي چلن وزارت د هوا پېژندنې ادارې اټکل کړی چې نن (یکشنبې، د سلواغې ۲۱ مه) به په ۲۵ ولایتونو کې درنه واوره او شدید بارانونه واوري.
دې ادارې د مختلفو ولایتونو لپاره د باران اندازه له ۱۵ څخه تر ۳۵ میلیمتره او د واورې اندازه له ۱۰ څخه تر ۴۰ سانتيمترو پورې اټکل کړې ده.
د هوا پېژندنې ادارې په کابل، پروان، پنجشیر، هرات، فراه، نیمروز، هلمند، کندهار، زابل، ارزګان، دایکنډي، غور، بادغیس، فاریاب، سرپل، بامیان، میدان وردګ، لوګر، پکتیا، پکتیکا، خوست، غزني، جوزجان او بلخ ولایتونو کې د درنې واورې، طوفان او شدید باران اټکل کړی دی.
دې ادارې خبرداری ورکړی چې په ځانګړې توګه په سالنګونو او د هېواد په لویدیځ، جنوب او مرکز کې د شدیدو بادونو امکان شته.
په دې سیمو کې به د باد سرعت په ساعت کې له ۵۰ څخه تر ۸۰ کیلومتره پورې وي. په ځینو ولایتونو کې د درنې واورې له امله لارې بندې او خلکو ته ستونزې پیدا شوي دي.