تاند【سه شنبه د سلواغې ـ دلوې ۱۶مه】د ایران د بهرنیو چارو وزیر، سید عباس عراقچي د پاکستان بهرنیو چارو د وزیر مرستیالې، آمنه بلوچ سره وکتل او خبرې یې وکړې.
د ایران بهرنیو چارو وزارت د خبرپاڼې له مخې، په دغه کتنه کې د پولو امنیت، د نشه یي توکو قاچاق او ناقانونه کډوالۍ مسایل، چې د ایران او پاکستان لپاره ګډې اندېښنې دي، وڅېړل شول.
دواړو لوریو دغه راز د سیمې د حالاتو په اړه، په ځانګړي ډول د افغانستان، غزې، سوریې او لبنان په اړه نظرونه تبادله کړل.
د خبرپاڼې له مخې، آمنه بلوچ د اقتصادي همکاریو سازمان (ایکو) د بهرنیو چارو د وزیرانو د مرستیالانو په غونډه کې د ګډون لپاره تهران ته سفر کړی دی.
د یادو هېوادونو ناسته په داسې مهال کېږي، چې دواړه د افغانستان د ګاونډیو هېوادونو په حیث د زرګونه افغان کډوالو کوربانه دي، خو دوی له افغان کډوالو سره تر ټولو بد چلند کوي.
افغانان تمه لري، چې دواړه هېوادونه به د ګاونډیتوب اصل ته په پام کډوالو سره له ناسم چلنده ډډه وکړی.