تاند (پنجشنبه، د مرغومي/ جدي ۲۷ مه) د طالبانو د ریاست الوزرا اقتصادي مرستیال ملاعبدالغني برادر، نن د پنجشنبې په کابل کې د “کورنۍ پانګونې لپاره ملي غوښتنې” تر سرلیک لاندې غونډه کې وویل چې هېواد ته د بېرته راستنېدونکو پانګوالو لپاره ځانګړې امتیازات په پام کې نیول شوي دي.
ده وویل چې په هېواد کې د پانګونې لپاره شرایط “په بشپړ ډول” برابر شوي دي او له سوداګرو غواړي چې په بېلابېلو اقتصادي برخو کې پانګونه وکړي.
عبدالغني برادر له کورنیو پانګوالو غوښتنه وکړه چې بهر ته د خپلو پانګو د وړلو پر ځای، خپلې پانګې په افغانستان کې ولګوي.
ده زیاته کړه: «د صنعتکارانو او بېرته راستنېدونکو پانګوالو لپاره د چمتو شوي طرزالعمل له مخې، هغه کسان چې په نوښتګرو صنعتي برخو کې پانګونه وکړي، پر نورو امتیازونو سربېره به د پنځو کلونو لپاره له ټولو مالیو پرته د کارکوونکو له مالیې معاف وي.»
ښاغلي برادر د خپلو خبرو په دوام کې وویل: «د دې پانګوالو د وارداتي ماشینونو او تجهیزاتو محصول به هم له ګمرکي فیس څخه معاف وي. سربېره پر دې، د دې پانګوالو بهرنیو کارکوونکو او انجنیرانو ته به د دوو کلونو ویزه ورکړل شي.»
عبدالغني برادر له ټولو افغان صنعتکارانو او پانګوالو چې په بهر کې دي، وغوښتل چې خپلې پانګې بېرته افغانستان ته راوړي او د هېواد په پرمختګ کې برخه واخلي. هغه ټینګار وکړ چې حکومت «ستاسو د اړتیاوو پراساس د هر ډول همکارۍ لپاره تیار دي.»
د ایراني چارواکو په وینا د طالبانو له واک ته رسیدو وروسته په ایران کې تر ټولو ډېره پانګونه افغانانو کړي چې څو میلیارد ډالرو ته رسیږي.
د نجونو پر زده کړه او کار بندیز او د امربالمعروف عجیب و غریب بندیزونه سبب شوي چې له افغانستان څخه ډېر پانګوال خپلې پانګې نورو هیوادونو ته ولېږدوي.