تاند (سې شنبه، د مرغومي/ جدي ۲۵ مه) د طالبانو د حکومت د کانونو او پیترولیم وزارت وايي چې د ترکمنستان، افغانستان، پاکستان او هندوستان د ګازو د ګډې پروژې درې کیلومتره نللیکه په افغانستان کې جوړه شوه.
انټرفکس خبري اژانس نن د دغه وزارت ویندوی همایون افغان له قوله وویل، له کله چې په افغانستان کې د ټاپي نللکې د جوړولو کار پیل شوی، تراوسه د افغانستان په خاوره کې درې کیلومتره پایپ لاین اېښودل شوی دی.
افغان همداراز وویل چې د ۳ اعشاریه ۴ کیلومتره نور پایپ لاین د غځولو لپاره مځکه برابره شوې ده.
ترکمنستان په خپله خاوره کې د دې نللیکې ۲۱۴ کیلومتره بشپړ کړی دی.
د ټاپي ګازو پایپلاین ۱۸۰۰کیلومتره اوږدوالی لري، چې له ترکمنستان څخه د افغانستان او پاکستان له لارې هند ته غځول کېږي. د دې نللیکې ۱۴۷کیلومتره د ترکمنستان په خاوره کې او ۷۳۵ کیلومتره به یې د افغانستان له هرات، فراه، هلمند او کندهار ولایتونو څخه تېره شي او پاتې ۸۰۰ کیلو مترو یې په پاکستان کې غځول کېږي. په پای کې به د هند فازیلیکا ته ورسیږي.
افغانستان به د دې پروژې له لارې هر کال کابو ۵۰۰میلیون ډالره د ترانزیت حق، او کله چې د ټاپي پروژه بشپړه شوه، تر لسو کلونو۵۰۰ میلیون مترمکعبه ګاز او تر شلو کلونو پورې به یو میلیارډ مترمکعب کاز ترلاسه کوي.
د لومړنیو څېړنو او شمېرو له مخې د ټاپي ګازو پایپلاین به هر کال ۳۳ میلیارده مترمکعب ګاز لیږدوي.
ټاکل شوې ده چې د ټاپي پروژې ترڅنګ یو شمېر نورې وړې او لویې پروژې هم پلې شي.د دې پروژې بله برخه هم د ۵۰۰کیلوواټ برېښنا لېږد ده چې له ترکمنستان څخه افغانستان او پاکستان ته لیږدول کېږي. د دې ترڅنګ په سیمه کې به د نوري فایبر مزی هم ولیږدل شي او دا به ګاونډي هېوادونه سره ونښلوي.
اټکل کېږي چې د دې نللیکې پر جوړولو به ۱۰ میلیارد ډالره ولګېږي.