تاند【 سه شنبه د مرغومي ـ جدي ۲۵مه】 د طالبانو د حکومت د صنعت او سوداګرۍ وزارت خبر ورکړی، چې افغانستان د ګول سیخ تولید کې ځان بسیاینې ته رسېدلی او ترکمنستان ۲۰۲۵ کال کې ۱۵۰ زره ټنه ګول سیخ افغانستان څخه پېري.
د یاد وزارت ویاند اخندزاده عبدالسلام جواد ویلي، تېر کال افغانستان کې ۶۰ زره ټنه تولید شوی ګول سیخ پاکستان ته صادر شوی او روان کال ترکمنستان سره د ۱۵۰ زره ټنه ګول سیخ د صادرولو قرارداد لاسلیک شوی دی.
نوموړي زیاته کړې، چې دا مهال شاوخوا ۴زره تنه ګول سیخ تولید فابریکو کې په کار مصروف دي.
د یادونې ده، چې تېرو درېیو کلونو کې د نورو برخو کې ترڅنګ د دې برخې ځان بسیاینې ته زیاته پاملرنه شوې او دغې سکټور کې میلیونونه ډالر پانګونه شوې ده.
اقتصاد پوهان هم په کور دننه پانګونه د هېواد د پرمختګ لپاره اړینه بولي.
دوی وایي حاکم نظام دې په داخل کې پانګوالو ته لازم چاپیریال برابر کړي څو پانګوال پانګونه وکړي او بې روزګاره خلکو ته د کار زمینه برابره شي.