تاند (دوشنبه، د مرغومي/ جدي ۲۴ مه) د ملګروملتونو د بشري مرستو د همغږۍ دفتر (اوچا) وايي چې سویس د افغانستان د بشري مرستو صندوق ته ۲.۳ میلیونه سویسي فرانکه، چې شاوخوا ۲.۶ میلیونه امریکایي ډالر کېږي، مرسته کړې ده.
دغه دفتر د دوشنبې په ورځ، د جدي په ۲۴مه، د سویس د دې مرستې هرکلی وکړ او ویې ویل: «ستاسو ملاتړ به په افغانستان کې د اړو خلکو په ژوند کې رښتینی بدلون راوړي.»
اوچا په داسې حال کې د سویس د ۲.۶ میلیون ډالري مرستې خبر ورکړی چې د روان کال د قوس په ۲۹مه یې د ۲۰۲۵ کال لپاره په افغانستان کې د ژوندانه د شرایطو او بشري اړتیاوو په اړه په یوه راپور کې ویلي و چې ۲۲.۹ میلیونه افغانان به د بقا لپاره بشري مرستو ته اړتیا ولري.
د ملګرو ملتونو دې دفتر ویلي و چې په راتلونکي کال کې ۱۶.۸ میلیونه افغانانو ته د مرستې رسول یې هدف ټاکلی، او د دې لپاره ۲.۴۲ میلیارد ډالرو ته اړتیا ده.
له بلې خوا په یخپل دې راپور کې ویلي چې د ۲۰۲۱ کال په اګست کې د طالبانو له بیا راتګ وروسته له افغانستان سره د شاوخوا ۶.۷ ملیارد ډالر بشري مرسته شوې ده.
اوچا همداراز ویلي، له افغانستان سره دا مرستې په داسې حال کې شوي چې په دغه هېواد کې له لسیزو راهیسې د سخت اقتصادي زوال، د خوړو د خوندیتوب نشتوالي، وچکالۍ او د روغتیايي سیستم د سقوط له امله تر ټولو سخت بشري ناورین لا هم دوام لري.
د اوچا په وینا، د شویو مرستو له امله د خلکو په ژوند کې د پام وړ پرمختګونه راغلي دي او زیاته شوې چې “په ۲۰۲۳ کال کې په افغانستان کې ۲۹.۲ میلیونه خلکو مرستې ته اړتیا درلوده. له هغه وخت راهیسې، وضعیت ثبات موندلی، د خوړو خوندیتوب، روغتیا پاملرنې، تعلیم، ساتنې، روغتیا ساتنې او سرپناه په څیر مهمو سکتورونو کې پرمختګونه لیدل شوي دي.”
د دې ادارې د معلوماتو په اساس دا مرستې په افغانستان کې د خوړو د خوندیتوب، د ماشومانو د خوارځواکۍ د درملنې، روغتیا او د سرپناه برابرولو په برخو کې لګول شوي دي.