تاند (جمعه، د جدي/ مرغومي ۷ مه) د البانیا صدراعظم ادي راما، اعلان وکړ چې هېواد به یې لږ تر لږه د یو کال په مخه د ټیک ټاک ټولنیزه شبکه بنده کړي.
دا بندیز به د ۲۰۲۵ میلادي کال له پیله عملي شي. ادي راما د ښوونکو، زدهکوونکو د والدینو او ارواپوهانو له یوې ډلې سره په کتنه کې وویل چې ټیک ټاک د “کلي بدماش” ګرځېدلی دی.
دا پرېکړه تر هغه لږ څه وروسته وشوه چې د البانیا په پلازمېنه تیرانا کې یوه ښوونځي ته نژدې یو ۱۴ کلن زدهکوونکی ووژل شو او بل زدهکوونکی ټپي شو. هغه شخړه چې د دې ځوان د وژنې سبب شوه، په ټیک ټاک کې پیل شوې وه.
دغه پېښه د دې لامل شوه چې په البانیا کې د ټولنیزو رسنیو د اغېز په اړه د ښوونکو، د زدهکوونکو د والدینو او ارواپوهانو ترمنځ بحثونه زیات شي.
په ټوله نړۍ کې تر یو میلیارد ډېر خلک د ټیک ټاک اپلیکېشن کاروي. دا ټولنیزه رسنۍ، چې الګوریتم یې لیدونکي خپلو ډېرو لنډو او ګڼ شمېر ویډیوګانو لیدو ته جلبوي، په ځانګړې توګه د ځوانانو په منځ کې ډېره مشهوره ده.
د نړۍ په څو هېوادونو کې د دولتي ادارو کارکوونکي د ټیک ټاک له کارولو څخه منع دي. د دې پرېکړې اصلي دلیل د ټیک ټاک د شرکت لپاره د چین د جاسوسۍ ادعا ده. دا ټولنیزه رسنۍ په امریکا کې له دې تور سره مخامخ ده، او د اروپايي اتحادیې چارواکي هم په دې اړه څېړنې کوي.
نهتره خو به دا وه چی طالب حکومت د مکاتبو او پوهنتونو پر ځای همدا ټیک ټاک بند کړی وای. دا ځکه نشی بنده ولی چی د چین پیداوار دی بیا به چینایان د دوی باداران خفه شی.