تاند ( دوشنبه د مرغومي/ جدي ۳مه) د طالبانو د حکومت د عامې روغتیا وزارت خبر ورکړی، چې نن د ډسمبر په ۲۳ مه په ۱۱ ولایتونو کې د ګوزڼ ضد واکسین کمپاین پیلېږي.
د طالبانو د عامې روغتیا وزرات وایي، چې دغه کمپاین به د ډسمبر تر ۲۵ مې نېټې پورې دوام وکړي.
سرچینه زیاتوي، چې د دې کمپاین په ترڅ کې به شاوخوا ۴،۸ میلیونه له پنځو کلنو کم عمره ماشومان واکسین شي.
د معلوماتو له مخې دا کمپاین به کابل، کندهار، هلمند، روزګان، زابل، ننګرهار، کونړ، لغمان، نورستان، هرات او کندز ولایتونه تر پوښښ لاندې ونیسي.
دغه کمپاین د پولیو ناروغۍ د مخنیوي لپاره ترسره کېږي.
افغانستان او پاکستان د نړۍ دوه هغه هېوادونه دي، چې د پولیو ناروغي پکې موجوده ده.