تاند ( چهارشنبه د لیندۍ/ قوس ۲۸مه) د مرکز کابل او یو شمیر ولایتونو اوسېدونکي له تاند سره په خبرو کې وایي،چې پاکستان عام افغانانو ته د ویزو په ورکړه کې لویه سوداګري روانه کړې ده.
د کابل اوسېدونکی سیدرحمن وایي: ” هغه افغانان چې اړتیا لري مجبور دي اوس وخت کې د پاکستان عاجله شپږمیاشتنۍ ویزه په ۱۵۰۰ ډالره ترلاسه کړۍ،که نه د عادي ویزو راتګ ۹۹ سلنه ناممکنه ده”
نوموړی وایي د ناورغۍ د درملنې لپاره یې پاکستان ته د تګ هوډ کړی خو په عادي بڼه د ۳ ځلې نوملیکنې او ۴ میاشتې انتظار کې یې هم ویزه رد شوې ده.
د ننګرهار اوسېدونکی جان اغا بیا وایي په عادي نوملیکنو تر ستړي کېدو وروسته اړ شو،چې په تور بازار کې په ۲۴ ساعتونو کې یوکلنه ویزه د ۱۸۰۰ ډالرو په بدل کې ترلاسه کړي.
هغه وایي په دې توره سوداګرۍ او پر عامو افغانانو د روان ظلم په اړه تر د طالبانو حکومت هېڅ اقدام نه دی کړی.
ټولنیزو رسنیو کې هم د پاکستاني ویزو پروسه ځینو خلکو ته د بحث جالبه او ځینو نورو ته بیا د اسانه سوداګرۍ لاره ښکاري.
خبریال رحمت الله زیارمل لیکي: “پاکستان افغانانو ته ، د انلاین ویزو د ورکړو سیستم اعلان کړی. هر افغان چې غواړي د پاکستان وېزې ته انلاین نوم لیکنه وکړي نو باید 20 ډالر پاکستان ته تحویل کړي.خو له بده مرغه چې د پاکستان د ویزې لپاره 99% سلنه غوښتنې له کوم دلیدل پرته ردېږي.”
هغه زیاته کړې: ” دا چې په ازاده نوم لیکنه کې 99 سلنه غوښتنې رد کوي، نو خلک مجبورً تور بازار ته مخه کړي. په تور بازار کې یو کلنه Multiple ویزه په 2000 ډالر ، د شپږ میاشتو Multiple ویزه په 1500 ډالر او د درې میاشتو ميډيکل ویزه په 550 ډالره ده.”
نوموړی وایي یو شمیر افغانانو هغه اسناد ورسره شریک کړي، چې پکې د پاکستان ویزې د پاکستان سفیر، په ننګرهار کې د پاکستان کونسل او د کونسلګرۍ مرستیال پلوري.
د ننګرهار یو شمیر نور اوسېدونکي هم د پاکستان پر کونسلګرۍ د فساد تور پورې کوي او غوښتنه کوي،چې د دې روان ښکاره ظلم مخه دې ونیول شي.
هڅه مو وکړه چې په دې اړه افغانستان کې د پاکستان د سفارت نظر هم ولرو خو د نظر په اخیستو یې بریالي نشو.
هغه دولت چې خپله تقلبي او جعلي وي ، نه تاریخي اساس ولري او نه جغرافیایی معقولیت او د جوړېدو اساس ، هغه به همداسې په فساد او رشوت کې ډوب وي .
له لوی درستیزه نیولې تر پنجابي صدراعظمه ، تر خارجه وزیر ، سفیر ، جنرال قونسل او ټیټ پوړي دیپلوماته ټول د رشوت اخیستلو په مرض اخته دي .
په دیپلوماتیکو اړیکو کې د متقابلو او بالمثله رویې او قاعدې پرنسیپ وجود لري .
که دوی له افغانانو 1000 دالره اخلي ، باید رسما له دوی نه هم 1000 دالره او که 2000 غواړي ، باید 2000 ترې واخیستل شي . په دې برخه کې خپله افغانان باید له خپل دولت سره همکاري وکړي ، چې څومره رشوت یې ورکړیدی، ترڅو په هغه اندازه ترې واخیستل شي .