تاند ( سه شنبه د لیندۍ/ قوس ۲۷مه) د افغانستان او زمبابوې د کرکټ ملي لوبډلو ترمنځ د درې یو ورځنیو لوبو لومړۍ لوبه د باران له کبله ځنډېدلې.
په پام کې وه چې دا لوبه نن د کابل پر وخت د غرمې په ۱۲ بجو پیل شي.
د افغانستان کرکټ بورډ پر خپله ایکس پاڼه لیکلي، چې د زمبابوې په پلازمینه هرارې کې د پرله پسې باران له کبله دا لوبه ځنډېدلې ده.
دواړه لوبډلې به دوه نورې یو ورځنۍ سیالۍ د ډسمبر په ۱۹مه او ۲۱مه ترسره کړي.
افغان لوبډلې له دې وړاندې د دریو شل اوره لوبو په لړۍ کې هم زمبابوې ته ۲-۱ ماته ورکړه.
دغه راز افغان کرکټ بورډ د دوه افغان لوبغاړو رحمن الله ګربز او مجیب ځدراڼ د ژوبلېدو خبر ورکړی دی.
کرکټ بورډ لیکلي، چې د ملي لوبډلې پیلیز توپوهونکی رحمن الله ګربز د ورانه عضلې د اوښتو او برېښ له امله د زمبابوې پر وړاندې د یو ورځنیو سیالیو له لوبلړۍ بهر شو.
د ګربز پر ځای به د لوبډلې بل ویکټ ساتونکی، توپوهونکی محمد اسحاق د ۱۸ کسیز نوملړ برخه وي.
همدارنګه د مجیب الرحمن د روغتیایي پروسې او معایناتو وروسته د اړوند ډاکټر له لوري نوموړي ته هم سپارښتنه شوې، ترڅو د تر بشپړې روغتیا او ډاډ پورې د یو ورځنیو لوبو پر مهال دمه وکړي.