تاند ( چهارشنبه د لیندۍ/ قوس ۲۱مه) د طالبانو د حکومت ویاند ذبیح الله مجاهد په خپله اېکسپاڼه لیکلي، چې د افغانستان ملي پراختیا شرکت تازه د ډمټرک موټر تولید پیل کړ.
مجاهد لیکلي،چې ژر به یادې موټرې په هېواد دننه د بار وړلو لپاره د استفادې وړ وګرځي.
نوموړي ویلي، چې ملي پراختیا شرکت نور هم ګڼ تولیدات لري، چې نندارې ته به وړاندې شي.
د طالبانو ویاند د ډاډ په ډول ویلي، چې افغانستان هره ورځ د خپلو اړتیاوو په پوره کېدو بوخت دی.
د یادونې ده،چې مجاهد څه موده وړاندې د یوه مسافر وړونکي بس د تولید خبر هم ورکړی و، چې افغانستان کې جوړ شوی و.
عام افغانان هم دا ډول خبرونه په نېک پال نیسي خو تمه لري،چې حکومت دې د تولیداتو ترڅنګ په تعلیمي برخه کې د ښځو پر وړاندې د زده کړو دروازې خلاصې کړي څو د ولس زړونه خپل کړي.