تاند (چهارشنبه، د لیندۍ/ قوس ۲۱ مه) څېړونکي په دې باور دي چې د ماسپښین له ۵ بجو وروسته خوراک کول احتمالاً د بدن د میټابولیزم او زړه لپاره زیانمن وي.
سایټیکډېلي ویبپاڼې په خپل راپور کې ویلي: له پخوا راهیسې خلک باور لري چې ماښام مهال یوه سپکه او وختي ډوډۍ خوړل روغتیا ته ګټوره ده. اوس د هسپانیا د اوبرتا دکتالونیا پوهنتون (UOC) او د امریکا د کولمبیا پوهنتون څېړونکو د دې ادعا د تایید لپاره علمي شواهد وړاندې کړي دي.
د دې څېړنې راپور، چې د Nutrition & Diabetes په مجله کې خپور شوی، ښيي چې د ورځې له ۴۵ سلنه څخه زیاته کالوري د ماسپښین له ۵ بجو وروسته خوړل د ګلوکوز (وینې شکر) د کچې له زیاتوالي سره تړاو لري او ممکن د خلکو پر روغتیا منفي اغېزې ولري، پرته له دې چې د هغوی وزن یا د بدن غوړ په پام کې ونیول شي.
ډاکتره ډیانا دیاز ریزولو (Diana Díaz Rizzolo)، چې د دې څېړنې مشري یې کړې، وايي: «د اوږدې مودې لپاره د ګلوکوز لوړوالی ممکن د دوهم ډول شکر، زړه او رګونو ناروغیو (ځکه چې د لوړ ګلوکوز کچه د وینې رګونو ته زیان رسوي) او مزمن التهاب خطر زیات کړي، چې په پایله کې یې د زړه او میټابولیک زیانونه پراخوي.»
متخصصانو پخوا باور درلود چې د ناوخته ډوډۍ خوړلو تر ټولو ډېره بدي دا ده چې وزن زیاتوي. خلک عموماً د شپې داسې خوراکونه کوي چې لږ غذایي ارزښت لري، لکه پروسس شوې خواړه. ځکه کله چې خلک د ورځې په اوږدو کې خواړه نه خوري، هغه هورمونونه چې لوږه او مړښت تنظیموي، بدلېږي.
ګاز لرونکي مشروبات، پیزا، سمدستي تیارېدونکي سوپونه او هغه مستې چې خواږه او د ځینو میوو خوند ورګډ شوی وي د پروسس شویو خوړو په کتار کې راځي.