تاند (چهارشنبه، د لیندۍ/ قوس ۱۴ مه) د ملګرو ملتونو د بشري حقونو لوی کمېشنر ولکر ترک، د ښځو او نجونو پر وړاندې د طالبانو تبعیضي پالیسۍ په کلکه وغندلې او د هغوی د سمدستي لغوه کېدو غوښتنه یې وکړه.
ترک دا وضعیت په اوسنۍ نړۍ کې بېساري وباله او د حقونو سیستماتیک انکار یې د دولت له خوا تمویل شوې د جنسیت پر بنسټ ظلم سره پرتله کړ.
هغه نن (چهارشنبې) وویل: ” د جنسیت پر بنسټ د نفوس د نیمایي برخې ځپل یو سخت او بېساری عمل دی.”
د ښځو د حقونو سیستماتیک له منځه وړنه
په تېرو درېیو کلونو کې، د افغان ښځو او نجونو لومړني بشري حقونه په منظمه توګه تر پښو لاندې شوي دي. د ښوونې، کار کولو او په عامه ژوند کې د ګډون پر وړاندې محدودیتونو د هغوی اساسي حقونه په جدي ډول محدود کړي دي. ملي فرمانونه او سیمهییز اقدامات د هغوی د ګرځېدو راګرځېدو، د سولهییزې راټولېدو، او د بیان ازادۍ په برخه کې آزادي کمزورې کړې ده.
ترک وویل چې د دې اقداماتو په نتیجه کې افغان ښځې “په خپلو کورونو کې مجازي بندیانې” شوي دي، د عامه ژوند په برخه کې یې رول ختم شوی او د هغوی بنسټیزې آزادۍ له منځه وړل شوي دي.
ترک د طالبانو د پالیسیو د اوږدمهاله پایلو په اړه خبرداری ورکړ، دا یې “په ملي کچه ځانوژنه” وبلله. هغه یادونه وکړه چې دا سیستماتیک جنسیتي ظلم به د افغانستان راتلونکي ته ویجاړوونکې وي، او د دې هېواد د سولې او دوامداره پرمختګ هیله به له منځه یوسي.
ده زیاته کړه: “دا نه یوازې د افغان ښځو او نجونو لپاره یو ناورین دی، بلکې د ټول هېواد لپاره هم یوه تراژیدي ده.”
د فوري اقداماتو غوښتنه
د ملګرو ملتونو د بشري حقونو مشر پر طالبانو بیا غږ وکړ چې د ښځو او نجونو پر وړاندې ټولې تبعیضي پالیسۍ لغوه کړي. هغه ټینګار وکړ چې د هغوی اساسي حقونه باید نه یوازې د عدالت د تامین لپاره، بلکې د افغانستان د یوې عادلانه او دوامدارې راتلونکې د جوړولو لپاره بېرته ورکړل شي.
هغه دا څرګندونې وروسته له دې وکړې چې طالبانو د سې شنبې له ورځې په هیواد کې هغه ټول انستیتیتونه بند اعلان کړل چې نجونو ته پکې د نرسۍ، قابله توب، غاښډاکترۍ او نورې نیمه طبي زده کړې ورکول کېدې.