تاند (چهارشنبه، د لیندۍ/ قوس ۱۴ مه) راشد خان، د افغانستان د کرکټ نومیالی ستوری وایي، چې د طبي انسټیټیوټونو د تړلو خبر د افغان نجونو پر مخ هغه “خفه او ناامیده” کړی دی.
راشد خان د خپلې فېسبوک پاڼې په یوه لیکنه کې ویلي، چې زده کړه په هر مسلمان نارینه او ښځینه “فرض” ده.
هغه لیکلي:
“په خپل ګران هېواد کې د خپلو خویندو پر مخ د طبي زده کړو د برخو د بندیدو راپورونه ما سخت خفه او ناامیده کړي دي. د خپلو خویندو او میندو دردونکي انځورونه لیدل او د هغوی حالت ډېر دردوونکی دی.”
راشد خان هیله څرګنده کړې، چې طالبان د ښوونیزو بنسټونو د تړلو پرېکړه بیا وڅیړي او د زده کړو لپاره نجونو ته زمینه برابره کړي.
د هغه په وینا، د افغانستان نجونې حق لري چې نه یوازې په طبي زده کړو، بلکې په نورو برخو کې هم خپل هېواد ته خدمت وکړي.
«لکه څنگه چې د یو هېواد د پرمختگ بنسټ په تعلیم پیل کیږي، همدا راز زموږ خویندې حق لري، چې تعلیم وکړي او خپلې ټولنې ته د طبي برخې سربېره په هره برخه کې د خدمت جوګه شي.»
دا غبرګون په داسې حال کې دی، چې طالبانو په دې وروستیو کې طبي انسټیټیوټونه د نجونو پر مخ تړلي دي.