تاند (یکشنبه، د لیندۍ/ قوس ۱۱ مه) ایران رسنیو د شنبې په ورځ د خپل هیواد د چارواکو له خولې راپور ورکړ چې د تهران په یوه ولسوالي کې د افغان مهاجرو ترمنځ د شخړې په پایله کې یو افغان وژل شوی دی.
د پردیس ولسوالۍ د امنیتي پولیسو قوماندان، مراد صارمي، د شنبې په ورځ (د لیندۍ ۱۰مه) خبریالانو ته وویل چې دا شخړه د دې ولسوالۍ د فوټسال د یوه لوبغالي مخې ته وشوه، چې په پایله کې یې یو کس وژل شوی او څو نور نیول شوي دي.
هغه زیاته کړه: «په دې شخړه کې قاتل چې سخت ټپي شوی و، د امبولانس په وسیله او د پولیسو تر څارنې لاندې روغتون ته انتقال شو. همداراز د شخړې دوه نور عاملان د قضايي همغږۍ په ترڅ کې د پولیسو لخوا نیول شوي او د امنیتي ځواکونو مقر ته لیږدول شوي دي.»
د پردیس ولسوالۍ د پولیسو قوماندان ټینګار وکړ چې نیول شوي کسان د قضايي مراحلو د بشپړیدو لپاره عدلي او قضايي ادارو ته سپارل شوي دي.
ایراني رسنیو د شخړې د علت په اړه ډېر څه نه دي ویلي.