تاند ( دوشنبه د لیندۍ/ قوس ۵مه) د افغانستان د برېښنا شرکت وایي، چې د تاجکستان برېښنا سهامي شرکت سره یې د ۲۰۲۵ کال لپاره هم د برېښنا پېرلو تړون لاسلیک کړ.
دغه تړون ترکیه کې د طالبانو د برېښنا شرکت عمومي اجرائیوي رئيس او تاجکستان برېښنا سهامي شرکت مشر محمد عمر عسازاده ترمنځ لاسلیک شوی دی.
د طالبانو د برېښنا شرکت ویاند حکمت الله میوندي وایي، د همدې تړون پر اساس به افغانستان له تاجکستان څخه په ۲۰۲۵ کال کې هم برېښنا وارد کړي.
د افغانستان زیاته برخه برېښنا وارداتي ده او په همدې موخه د برېښنا شرکت هر کال له څلور ګاونډیو هېوادونو تاجکستان، ازبکستان، ترکمنستان او ایران سره د وارداتي برېښنا تړونونه نوي کوي.
دغه تړون داسې مهال لاسلیک کېږي، چې عام افغانان په کور دننه د برېښنا له پرچاوۍ سخت شکایتونه لري.