تاند (شنبه، د لیدندۍ/ قوس ۳ یمه) د افغانستان لپاره د ملګرو ملتونو مرستندوی ماموریت (یوناما) په بغلان ولایت کې د صوفیانو پر زیارت وسله برید غندلی او له طالبانو یې غوښتي چې دا پېښه بشپړه وڅېړي او په راتلونکې کې د داسې بریدونو د تکرار مخه ونیسي.
د پنجشنبې په شپه ناڅرګندو وسلهوالو د بغلان ولایت د نهرین ولسوالۍ په “سیدپادشاه آغا” زیارت برید وکړ او په دعا بوخت صوفیان یې په ډزو ووژل.
د بغلان ولایت د پولیسو قوماندانۍ په یوه خبرپاڼه کې تایید کړې چې په دې برید کې لږ تر لږه ۱۰ کسان وژل شوي دي.
د افغانستان لپاره د ملګرو ملتونو مرستندوی ماموریت نن (شنبې، د قوس په ۳مه) په یوه خبرپاڼه کې، چې پر ایکسپاڼه یې خپره کړې ده، ویلي چې طالبان باید ډاډ ورکړي چې ټولنې خوندي دي.
تر دې دمه هېڅ ډلې د دې مرګوني برید مسوولیت نه دی منلی. خو ګومان کېږي دا برید به داعش ډلې کړی وي چې له زیارتونو او صوقیانو سره اختلاف لري.
طالبانو ویلي چې د دې برید په تړاو یې څو تنه مشکوک کسان نیولي دي. خو هغوی نه دي ویلي چې نیول شوي کسان له کومې ډلې سره د تړاو په شک نیول شوي دي.